Arvind kejriwal: కేజ్రీవాల్‌కు తల్లిదండ్రుల స్వాగతం.. వారిని చూసి సీఎం భావోద్వేగం

దిల్లీ: తిహాడ్‌ జైలు నుంచి మధ్యంతర బెయిల్‌పై విడుదలైన దిల్లీ ముఖ్యమంత్రి అరవింద్‌ కేజ్రీవాల్‌ (Arvind Kejriwal) ఇంటికి చేరుకున్నారు. అక్కడ తన తల్లిదండ్రులను చూడగానే  ఆలింగనం చేసుకొని భావోద్వేగానికి గురయ్యారు. వారి పాదాలకు నమస్కరించారు. ఆయనకు పూలమాల వేసిన తల్లి హారతి ఇచ్చి బొట్టుపెట్టి ఇంట్లోకి స్వాగతం పలికారు.

దిల్లీ మద్యం విధానం కేసులో మనీలాండరింగ్‌ ఆరోపణలపై  మార్చి 21న కేజ్రీవాల్‌ను ఈడీ అధికారులు అరెస్టు చేయగా.. దాదాపు 50 రోజుల పాటు ఆయన జైలులో ఉన్న విషయం తెలిసిందే. తన అరెస్టును సవాల్‌ చేస్తూ సుప్రీంకోర్టులో పిటిషన్‌ వేయగా.. ఎన్నికల ప్రచారం నేపథ్యంలో కేజ్రీవాల్‌కు మధ్యంతర బెయిల్‌ మంజూరైంది. జూన్‌ 2న తిరిగి కేజ్రీవాల్‌ సరెండరై జైలుకు రావాలంటూ కోర్టు పలు షరతులు విధించింది.