CM Jagan: 22న ఒంగోలుకు సీఎం జగన్‌? బాలినేనికి కీలక పదవిపై వెల్లడి?

ఈనాడు డిజిటల్‌, ఒంగోలు: ముఖ్యమంత్రి జగన్‌మోహన్‌రెడ్డి ఈ నెల 22న ఒంగోలుకు రానున్నట్లు తెలిసింది. ఆ రోజు నవరత్నాల్లో భాగంగా సున్నావడ్డీ పథకం కింద మూడో ఏడాది డ్వాక్రా మహిళల ఖాతాలకు నగదు విడుదల చేయనున్నారు. సీఎం పాల్గొనే కార్యక్రమం, పర్యటన షెడ్యూల్‌ ఇంకా అధికారికంగా వెల్లడికాలేదు. అలాగే గుండ్లాపల్లి గ్రోత్‌సెంటర్‌ వద్ద తాజా మాజీ మంత్రి బాలినేని శ్రీనివాసరెడ్డి చొరవతో ప్రకాశం జిల్లాకు చెందిన ఎన్నారైలు ఏర్పాటుచేస్తున్న ఐటీ కంపెనీని కూడా ప్రారంభించే అవకాశముంది. బాలినేనికి కీలక పదవి విషయాన్ని ముఖ్యమంత్రి ఆ రోజు వెల్లడిస్తారని సమాచారం. గతేడాది అక్టోబరు 6న సీఎం ఒంగోలు వచ్చి ‘ఆసరా’ కార్యక్రమంలో పాల్గొన్నారు. జిల్లాల విభజన తర్వాత తొలిసారి ఇక్కడకు రానున్నారు.