Andhra News: అంగన్‌వాడీ వర్కర్ల అడ్డగింత.. 12గంటలకు పైగా రహదారిపై నిరసన

పెళ్లకూరు, న్యూస్‌టుడే: ఏపీ ప్రగతిశీల అంగన్‌వాడీ వర్కర్లు, హెల్పర్ల సంఘం ఆవిర్భావ మహాసభకు తరలివెళ్తున్న మహిళల బస్సులను పోలీసులు అడ్డుకోవడం విమర్శలకు తావిచ్చింది. దీంతో వారు 12గంటలకు పైగా రోడ్డుపై బైఠాయించి నిరసన తెలుపుతున్నారు. బాధితుల కథనం ప్రకారం.. తిరుపతి జిల్లా శ్రీకాళహస్తి, సత్యవేడు నియోజకవర్గాల్లోని మహిళలు విజయవాడలో ఆదివారం నిర్వహించే సభకు ప్రైవేటు బస్సుల్లో తరలివెళ్తున్నారు. శనివారం రాత్రి 7 గంటల సమయంలో పెళ్లకూరు మండలం చావలి వద్ద జాతీయరహదారి 71పై పోలీసులు బస్సులను ఆపేశారు. దీంతో 150 మందికి పైగా మహిళలు తాగునీరు, భోజనాలకు అవస్థలు పడ్డారు.

దీంతో ఆగ్రహించిన మహిళలు పోలీసులను నిలదీశారు. తామంతా సొంత ఖర్చులతో సభకు వెళ్తుంటే ఆపడం ఏంటని ప్రశ్నించారు. తమను రోడ్డు పక్కన నిలబెట్టడంపై అక్కడే నిరసనకు దిగారు. విజయవాడలో జరిగే సభకు తమను అనుమతించాలని లేనిపక్షంలో ఇక్కడే నిరసన తెలుపుతామని అంగన్వాడీ కార్యకర్తలు స్పష్టం చేశారు.