Kangana Ranaut: చేయాల్సిన సినిమాలు చాలా ఉన్నాయి.. రూమర్స్‌పై స్పందించిన కంగనా

ఇంటర్నెట్‌ డెస్క్‌: బాలీవుడ్‌ ప్రముఖ నటి కంగనా రనౌత్ (Kangana Ranaut) హిమాచల్ ప్రదేశ్‌లోని మండి లోక్‌సభ అభ్యర్థిగా భాజపా తరఫున పోటీ చేస్తోన్న విషయం తెలిసిందే. ఈనేపథ్యంలో ఆమె ఇక సినిమాలు మానేస్తున్నట్లు కొన్ని వార్తలు వస్తున్నాయి. తాజాగా ఈ విషయంపై కంగనా స్పష్టతనిచ్చారు.

‘ఎన్నికల తర్వాత నేను సినిమాలు మానేస్తున్నట్లు వస్తోన్న వార్తల్లో నిజం లేదు. ఇండస్ట్రీలో కొనసాగుతాను. ఎందుకంటే చేయాల్సిన సినిమాలు చాలా ఉన్నాయి’ అని ఓ ఆంగ్ల మీడియాకు ఇచ్చిన ఇంటర్వ్యూలో ఆమె స్పష్టం చేశారు. సినిమాలు పరాజయం కావడం వల్లే కంగనా పాలిటిక్స్‌లోకి వెళ్లారనే వార్తలపై కూడా ఇటీవల ఆమె స్పందించారు. ‘ఫ్లాపులు లేకుండా కేవలం హిట్స్‌ మాత్రమే అందుకున్న నటీనటులెవరూ ఈ ప్రపంచంలో లేరు. కెరీర్‌ ఆరంభంలో నేను నటించిన ఏ సినిమా బాక్సాఫీస్‌ వద్ద ఆడలేదు. దాదాపు ఎనిమిదేళ్లు ఫ్లాప్స్‌ చూశా. ఆ సమయంలో ‘క్వీన్‌’ విడుదలతో సక్సెస్‌ దక్కింది. ఆ తర్వాత వరుసగా కొన్ని విజయాలు చూశా. త్వరలో ‘ఎమర్జెన్సీ’ రానుంది. అది విజయం సాధిస్తుందన్న నమ్మకముంది’ అన్నారు.

టాప్‌ 5 మలయాళీ చిత్రాలు.. ఓటీటీలో ఎక్కడ చూడొచ్చంటే?

ప్రస్తుతం ఎన్నికల ప్రచారంలో బిజీగా ఉన్న కంగనా.. ‘ఎమర్జెన్సీ’ విడుదల కోసం ఎదురుచూస్తున్నారు. 2019లో విడుదలైన ‘మణికర్ణిక’ తర్వాత ఆమె స్వీయ దర్శకత్వంలో తెరకెక్కిన చిత్రమిది. మాజీ ప్రధాని ఇందిరాగాంధీ జీవితం ఆధారంగా రానున్న ఈ సినిమాకు ఆమె నిర్మాతగానూ వ్యవహరిస్తున్నారు. తన ఆస్తులన్నింటినీ తనఖా పెట్టి ఆమె ఈ చిత్రాన్ని నిర్మించారు. ఇందులో ఇందిరాగాంధీ పాత్రలో కంగనా నటించగా.. జయప్రకాష్‌ నారాయణ్‌ పాత్రలో అనుపమ్‌ ఖేర్‌, మాజీ ప్రధాని అటల్‌ బిహారీ వాజ్‌పేయీ పాత్రలో శ్రేయస్ తల్పడే కనిపించనున్నారు. జూన్‌ 14న ఈ చిత్రం విడుదల కానుంది.