‘అదానీ జెట్టీ’ స్వాధీనానికి రంగం సిద్ధం

ఈనాడు, విశాఖపట్నం: విశాఖ నౌకాశ్రయంలోని అదానీ జెట్టీని స్వాధీనం చేసుకోవడానికి నౌకాశ్రయ ఉన్నతాధికారులు రంగం సిద్ధం చేశారు. ఇ.క్యు.-1 జెట్టీని అదానీ సంస్థ సుమారు రూ.370 కోట్లు వెచ్చించి అభివృద్ధి చేసినా ఆశించిన స్థాయిలో వ్యాపార కార్యకలాపాలు నిర్వహించలేకపోయింది. దాని నిర్వహణ లాభదాయకం కాదని నిర్ణయానికి వచ్చి కార్యకలాపాలను పూర్తిగా నిలిపివేసింది. జెట్టీ నుంచి పోర్టుకు ఆదాయం రాకపోవడంతో నౌకాశ్రయ ఉన్నతాధికారులు ఆ సంస్థకు నోటీసులు జారీ చేశారు. వ్యాపార కార్యకలాపాలు నిర్వహించకపోతే నిబంధనల ప్రకారం రూ.165 కోట్లు చెల్లించి జెట్టీని స్వాధీనం చేసుకునే హక్కు నౌకాశ్రయానికి ఉంది. ఆ మొత్తం చాలా తక్కువని అదానీ సంస్థ మధ్యవర్తిత్వ న్యాయస్థానాన్ని ఆశ్రయించింది. దీనిపై తుదితీర్పునకు మరికొంత సమయం పట్టే అవకాశమున్న నేపథ్యంలో రూ.వంద కోట్లు చెల్లించి ముందుగా స్వాధీనం చేసుకోవాలని ఇటీవల న్యాయస్థానం సూచించింది. ఈ నేపథ్యంలో తదుపరి చర్యలపై ఎలాంటి నిర్ణయం తీసుకోవాలో ఆదేశాలివ్వాలని నౌకాశ్రయ అధికారులు కేంద్ర నౌకాయాన శాఖ ఉన్నతాధికారులకు లేఖ రాశారు. వివాదానికి సంబంధించిన వివరాలను పంపాలని అక్కడి నుంచి సమాచారం వచ్చింది.

ఉన్నతాధికారుల ఆదేశాల ప్రకారం నిర్ణయం
- కె.రామమోహనరావు, ఛైర్మన్‌, విశాఖ నౌకాశ్రయం

అదానీకి కేటాయించిన జెట్టీలో కార్యకలాపాలు నిర్వహించకపోవడంతో అందులోని యంత్రాలన్నీ చాలాకాలంగా నిరుపయోగంగా పడి ఉన్నాయి. ఇప్పుడు అవి ఏ స్థితిలో ఉన్నాయి.. నౌకాశ్రయానికి అవి ఉపయోగమా? కాదా తేల్చడానికి ‘కండిషన్‌ సర్వే’ నిర్వహించాలి. అంతా బాగుంటే నిర్ణీత మొత్తం చెల్లించి జెట్టీని పూర్తిస్థాయిలో స్వాధీనం చేసుకుంటాం.