ధాన్యానికి రవాణా ఛార్జీలు ఇవ్వట్లేదు

ఆర్‌బీకేల్లో విజిలెన్స్‌ తనిఖీల్లో గుర్తింపు

ఈనాడు, అమరావతి: రైతు భరోసా కేంద్రాల ద్వారా అమ్మిన ధాన్యానికి రవాణా ఛార్జీలు చెల్లించడం లేదు. పైపెచ్చు మిల్లర్లు ఒక్కో బస్తాకు 2-3 కిలోల ధాన్యాన్ని అదనంగా తీసుకుంటున్నారు. శ్రీకాకుళం జిల్లా రణశాలెం రైతు భరోసా కేంద్రంలో తనిఖీల సందర్భంగా విజిలెన్స్‌ అధికారులు ఈ విషయాన్ని గుర్తించారు. క్షేత్రస్థాయిలో రైతు భరోసా కేంద్రాల పనితీరుపై రాష్ట్రవ్యాప్తంగా 50 కేంద్రాల్లో 42 విజిలెన్స్‌ బృందాలు శనివారం విస్తృత తనిఖీలు నిర్వహించాయి. ఈ సందర్భంగా వ్యవసాయ సాంకేతిక సందేహాల నివృత్తికి ఏర్పాటుచేసిన 155251, టోల్‌ఫ్రీ నంబరు 14400 ప్రదర్శించడం లేదని, పలుచోట్ల ఈ-కేవైసీ కూడా పూర్తికాలేదని గుర్తించినట్లు అధికారులు పేర్కొన్నారు. రైతులతో ముఖాముఖి నిర్వహించి ఆర్‌బీకేల పనితీరును తెలుసుకున్నామని వివరించారు.

- ఈనాడు, చిత్తూరు