నన్ను నిర్బంధించి.. ఆస్తి కాజేశారు

వైకాపా ఆదోని పట్టణాధ్యక్షుడిపై యువతి ఆరోపణ

ఆదోని నేరవార్తలు, న్యూస్‌టుడే: తనను నిర్బంధించి హింసించి.. అక్రమంగా తన ఆస్తిని అమ్మేశారంటూ కర్నూలు జిల్లా ఆదోని పట్టణ వైకాపా అధ్యక్షుడు దేవపై ఓ యువతి ఆరోపించడం స్థానికంగా కలకలం సృష్టించింది. నిర్బంధం నుంచి తప్పించుకున్న ఆమె శుక్రవారం స్థానిక మూడో పట్టణ పోలీసు స్టేషన్‌లో ఫిర్యాదు చేశారు. పోలీసులు తెలిపిన వివరాల ప్రకారం.. ఆదోనికి చెందిన ఓ యువతికి ఎమ్మిగనూరు రోడ్డులో రూ. 4 కోట్ల విలువైన భూమి ఉంది. వైకాపా పట్టణ అధ్యక్షుడు దేవ ఆ యువతికి ఆమె తల్లి సహకారంతో ఇష్టం లేని పెళ్లి చేశారు. దీంతో కొన్నాళ్లకే ఆమె పుట్టింటికి వచ్చేశారు. అనంతరం దేవ తనను మూడు నెలల పాటు నిర్బంధించి, శారీరకంగా, మానసికంగా హింసించాడని, తన ఆస్తిని అక్రమంగా వేరేవారికి అమ్మేసి తనతో బలవంతంగా సంతకాలు పెట్టించి రిజిస్ట్రేషన్‌ చేయించాడని బాధితురాలు పేర్కొన్నారు. ఒక్క రూపాయి కూడా తనకు ఇవ్వలేదని తెలిపారు. ఈ విషయమై మూడో పట్టణ సీఐ శ్రీరామ్‌ను ‘న్యూస్‌టుడే’ వివరణ కోరగా.. యువతి ఫిర్యాదుపై విచారణ చేస్తున్నామని పేర్కొన్నారు.