భూ దందా అడ్డుకున్నందుకు బదిలీ?

వెళ్లనని మొరపెట్టుకున్నా డిప్యుటేషన్‌
దేవాదాయశాఖ కమిషనరేట్‌లో వింత ధోరణి

ఈనాడు-అమరావతి: దేవాదాయశాఖ కమిషనరేట్‌లో అధికారుల ధోరణి చిత్ర విచిత్రంగా ఉంటోంది. అక్కడ పనిచేస్తున్న ఉద్యోగులు అంగీకారం తెలిపితేనే ఇతర చోట్లకు బదిలీపైగానీ, డిప్యుటేషన్‌పైగానీ పంపాల్సి ఉండగా.. అవేమీ పట్టించుకోకుండా తమకు పంటికింద రాయిలా ఉండేవారిని పంపేస్తున్నారనే విమర్శలు వస్తున్నాయి. ఇటీవల ఓ సీనియర్‌ అసిస్టెంట్‌ను, దేవాదాయ ట్రైబ్యునల్‌కు డిప్యుటేషన్‌పై పంపుతూ ఉత్తర్వులిచ్చారు. వాస్తవానికి ఆయనను కొద్ది రోజుల కిందటే కమిషనరేట్‌లోని ఓ సెక్షన్‌ నుంచి భూముల విభాగానికి బదిలీ చేశారు. అదే సమయంలో కాకినాడలోని ఓ ఆలయానికి చెందిన రూ.కోట్ల విలువైన భూమికి 20 ఏళ్ల కిందట వేలం జరిగితే, ఇపుడు నిబంధనలకు విరుద్ధంగా ఓ సంస్థ పేరిట రిజిస్ట్రేషన్‌ చేసేందుకు అధికారులు దస్త్రాన్ని సిద్ధంచేశారు. ఈ అంశం బయటకు రావడంతో ఆ భూమి రిజిస్ట్రేషన్‌ ఆగిపోయింది. ఇందుకు భూముల విభాగానికి బదిలీపై వచ్చిన సీనియర్‌ అసిస్టెంటే కారణమని ఉన్నతాధికారులు భావిస్తున్నట్లు సమాచారం. దీంతో ఆయనను కమిషనరేట్‌లోనే ఉంచకూడదనే ఉద్దేశంతో దేవాదాయ ట్రైబ్యునల్‌కు బలవంతంగా డిప్యుటేషన్‌పై పంపుతూ ఆదేశాలిచ్చారని ఉద్యోగుల్లో ప్రచారం జరుగుతోంది. మరోవైపు తాను ట్రైబ్యునల్‌కు వెళ్లనని, తన అభిప్రాయాన్ని తీసుకోలేదంటూ ఆ ఉద్యోగి ఉన్నతాధికారులకు అర్జీ పెట్టినాసరే పట్టించుకోవడంలేదని తెలిసింది. ఇదే కమిషనరేట్‌లోని వేరొక సీనియర్‌ అసిస్టెంట్‌.. తనను ట్రైబ్యునల్‌కు పంపాలని కోరినా అధికారులు పరిగణనలోకి తీసుకోలేదు. అలాగే సూపరింటెండెంట్‌ సైతం తనను ట్రైబ్యునల్‌కు ఏవోగా పంపాలని కోరుతునే ఉన్నారు. ఇలా అభ్యర్థన పెట్టుకున్నవారికి కాకుండా, ఓ ఉద్యోగిని లక్ష్యంగా చేసుకొని బదిలీ చేయడం, తర్వాత రిలీవింగ్‌ చేయకపోవడం, ఆయనకు జీతం కూడా రాకుండా ఆపేయడంపై కమిషనరేట్‌లో పెద్దచర్చే జరుగుతోంది.