సైబర్‌ నేరగాళ్ల ఖాతాల జప్తు

ఈనాడు డిజిటల్‌, కడప: సైబర్‌ నేరగాళ్ల బ్యాంకు ఖాతాల్లోని రూ.27 కోట్ల నిధులను ఈడీ జప్తు చేసింది. ఈ తరహా చర్య చోటుచేసుకోవడం రాష్ట్రంలో తొలిసారి. మేకింగ్‌ మనీ యాప్‌, ఆర్‌సీసీల పేరిట వైయస్‌ఆర్‌ జిల్లాలో రూ.11 కోట్లను కొల్లగొట్టడంపై గత ఏడాది నవంబరులో కడప ఒకటో పట్టణ పోలీసుస్టేషన్‌ పరిధిలో నాలుగు కేసులు నమోదయ్యాయి. ‘దర్యాప్తులో భాగంగా తమిళనాడుకు చెందిన ఇద్దరు సైబర్‌ నేరగాళ్లను అరెస్టు చేసి వారి బ్యాంకు ఖాతాలను స్తంభింప చేసి తదుపరి చర్యల నిమిత్తం ఈడీకి సిఫారసు చేశాం. ప్రస్తుతం ఈ కేసులకు సంబంధించి స్తంభింపజేసిన బ్యాంకు ఖాతాల్లోని రూ.27 కోట్లను ఈడీ జప్తు చేసింది’ అని ఎస్పీ అన్బురాజన్‌ వెల్లడించారు.