TTD - Tirumala: ఆ భక్తులకు శ్రీవారి సేవల భాగ్యం దూరమే

కొవిడ్‌ సమయంలో సేవలకు నమోదు చేసుకున్న వారికి నిరాశే

ఈనాడు, తిరుపతి: కొవిడ్‌ సమయంలో శ్రీవారి సేవాటికెట్లను ముందస్తుగా నమోదు చేసుకుని ఆ భాగ్యం పొందలేని భక్తుల కోసం రీషెడ్యూల్‌ చేసి ఆ సేవలకు అనుమతించలేమని తితిదే అధికారులు స్పష్టం చేశారు. వారు బ్రేక్‌ దర్శనానికి రావచ్చని సూచించారు. కొవిడ్‌ సమయంలో 2020 మార్చి 20 నుంచి 2021 ఏప్రిల్‌ 13 వరకు భక్తులను సేవలకు అనుమతించలేదు. స్వామివారికి ఏకాంతంగా కైంకర్యాలు నిర్వహించారు. ఈ సమయంలో శ్రీవారి సుప్రభాతం, అర్చన, తోమాల, అభిషేకం, తిరుప్పావడ, వసంతోత్సవం, విశేష పూజ, నిజపాద దర్శనం సేవలను చూసేందుకు 17,946 మంది భక్తులు ముందస్తుగా పేర్లు నమోదు చేసుకున్నారు. పరిస్థితులు అనుకూలించినప్పుడు అవకాశం లభిస్తుందని నిరీక్షిస్తున్నారు. వారి ఆశలపై నీళ్లు చల్లుతూ ఈ సేవలకు వారిని అనుమతించలేమని అధికారులు పేర్కొన్నారు. బ్రేక్‌ దర్శనం లేదా సొమ్మును వాపసు తీసుకోవచ్చని సూచించారు. ఇందులో భాగంగా సుమారు 8965 మంది బ్రేక్‌ దర్శనం చేసుకోగా.. 8,717 మంది ఇంకా నిరీక్షిస్తూనే ఉన్నారు.