ఎకరా వరికి బీమా పరిహారం రూ.32

లెక్కగట్టిన అధికారులు
కిలో బియ్యమైనా వస్తాయా అని రైతుల ఆవేదన

ప్రకాశం జిల్లా ముండ్లమూరు మండలం పసుపుగల్లులో భానుముక్కల లక్ష్మీరెడ్డి 1.15 ఎకరాల్లో వరి సాగు చేస్తే పంటల బీమా కింద రూ.36.50 పరిహారం వస్తుందని అధికారులు తేల్చారు. అదే గ్రామానికి చెందిన పిచ్చయ్య అనే రైతుకు రెండెకరాల వరికి ఎకరానికి రూ.32 చొప్పున మంజూరు చేశారు. ఈ పరిహారం లెక్కలు చూసి రైతులు విస్తుపోతున్నారు. జిల్లాలో దానిమ్మ సాగు చేసిన రైతులకు అసలు పరిహారం దక్కలేదు.

ఎకరాకు రూ.40వేలకు పైగా పెట్టుబడి

ఎకరా వరికి పంటల బీమా పరిహారంగా రూ.32 సరిపోతుందని ప్రభుత్వం నిర్ణయించింది. ప్రభుత్వం మంజూరు చేసిన పంటల బీమా సొమ్ముతో కిలో బియ్యమైనా వస్తాయా?అని రైతులు ప్రశ్నిస్తున్నారు. సాగులో కష్టనష్టాలేమిటో అధికారులకు తెలుసా అని మండిపడుతున్నారు. ఎకరాకు రూ.40వేలకు పైగా పెట్టుబడి పెట్టి.. వర్షాలకు నష్టపోయామని, ఇంత దారుణంగా పరిహారం ఇచ్చిన వైనం మునుపెన్నడూ చూడలేదని ఆవేదన వ్యక్తం చేస్తున్నారు.          

న్యూస్‌టుడే, ముండ్లమూరు