వాలంటీర్లు విలవిల

అమలాపురం కలెక్టరేట్‌, న్యూస్‌టుడే: సీఎం పర్యటన ఉందంటే ఆ ప్రాంతంలోని అధికారులు, సామాన్యులు, వాలంటీర్లకూ ఇక్కట్లు తప్పడం లేదు. శుక్రవారం డా.బీఆర్‌ అంబేడ్కర్‌ కోనసీమ జిల్లా కేంద్రం అమలాపురానికి సీఎం వస్తున్న నేపథ్యంలో వాలంటీర్లకు విధులు కేటాయించారు. హెలిప్యాడ్‌ నుంచి సభాస్థలి వరకు సుమారు 350 మంది వాలంటీర్లను పహారాగా ఉంచారు. ప్రతి 10 మీటర్లకు ఒకరుండేలా ఏర్పాట్లు చేశారు. గురువారం వారికి కేటాయించిన ప్రాంతాల్లో శిక్షణ ఇచ్చారు. ఈ సందర్భంగా పలువురు మహిళా వాలంటీర్లు ఎండలో నిల్చోలేక విలవిల్లాడారు. తలపై చున్నీలతో ఉపశమనం పొందారు.