Infosys Foundation: ఇన్ఫోసిస్‌ దాతృత్వం.. కర్ణాటక పోలీసులకు ₹33 కోట్లు

బెంగళూరు: దేశీయ ఐటీ దిగ్గజం ఇన్ఫోసిస్‌ (Infosys) మరోసారి తన దాతృత్వాన్ని చాటుకుంది. సైబర్‌ నేరాలపై పోరాటంలో భాగంగా బెంగళూరు పోలీసులకు భారీ మొత్తాన్ని విరాళంగా అందజేసింది. కర్ణాటక పోలీసుల సైబర్‌ క్రైమ్‌ ఇన్వెస్టిగేషన్‌ సామర్థ్యాన్ని బలోపేతం చేసేందుకు వీలుగా రూ.33 కోట్లు మంజూరుచేసింది. ఈ విషయాన్ని ఇన్ఫోసిస్‌ ఫౌండేషన్‌ సీఎస్‌ఆర్‌ విభాగం బుధవారం వెల్లడించింది. ఈమేరకు బెంగళూరులోని సీఐడీ ప్రధాన కార్యాలయంలో సెంటర్‌ ఫర్‌ సైబర్‌ క్రైం ఇన్వెస్టిగేషన్‌ ట్రైనింగ్‌ అండ్‌ రీసెర్చి(CCITR) సహకారాన్ని పునరుద్ధరించేందుకు వీలుగా  సీఐడీ, డేటా సెక్యూరిటీ కౌన్సిల్‌ ఆఫ్‌ ఇండియా(DSCI)తో చేసుకున్న ఎంవోయూపై సంతకాలు చేసినట్లు పేర్కొంది. CCITRతో అనుబంధాన్ని మరో నాలుగేళ్ల పాటు పొడిగించడం ద్వారా సైబర్ నేరాల్లో దర్యాప్తు సామర్థ్యం మరింత బలోపేతమవుతుందని ఇన్ఫోసిస్‌ ఫౌండేషన్‌ తెలిపింది.