Oyo IPO: ఓయో ఐపీఓ పరిమాణం తగ్గనుందా?

దిల్లీ: ఓయో పేరిట ఆతిథ్య సేవలను అందిస్తోన్న ‘ఒరావెల్‌ స్టేస్‌ లిమిటెడ్‌’ మరోసారి ఐపీఓ (OYO IPO)కి దరఖాస్తు చేసుకునేందుకు సన్నాహాలు చేసుకుంటున్నట్లు తెలుస్తోంది. వారం వ్యవధిలో సెబీకి ముసాయిదా పత్రాలు సమర్పించే అవకాశం ఉందని సమాచారం. అయితే, ఐపీఓ పరిమాణాన్ని మూడింతలకు తగ్గించాలని నిర్ణయించినట్లు ఈ వ్యవహారంతో సంబంధం ఉన్న కంపెనీ వర్గాలు తెలిపాయి.

మార్కెట్‌ తీవ్ర ఒడుదొడుకుల్లో చలిస్తుండడం.. మరోవైపు కొత్తతరం టెక్‌ కంపెనీల్లో ప్రతికూల పరిస్థితులు నెలకొన్న నేపథ్యంలో ఐపీఓ విషయంలో ఓయో ఆచితూచి అడుగులు వేస్తున్నట్లు సమాచారం. ఈసారి ‘ఆఫర్‌ ఫర్‌ సేల్‌’ కింద ఎలాంటి షేర్లను విక్రయించబోదని తెలుస్తోంది. రూ.8,430 కోట్ల సమీకరణ లక్ష్యంతో ఓయో 2021లోనే ఐపీఓకి దరఖాస్తు చేసుకుంది. కానీ, వివిధ కారణాల వల్ల అది వాయిదా పడుతూ వచ్చింది. తాజాగా తగిన మార్పులు చేసి మళ్లీ ముసాయిదా పత్రాలను సమర్పించాలని సెబీ గత డిసెంబరులో ఆదేశించింది.

మామాఎర్త్‌ ఐపీఓ ప్రణాళికల్లో మార్పూ లేదు..

చర్మ సంరక్షణ ఉత్పత్తుల సంస్థ మామాఎర్త్‌.. ఐపీఓ ప్రతిపాదనలను ఉపసంహరించుకుంటోందని వస్తున్న వార్తల్ని కంపెనీ సీఈఓ వరుణ్‌ అలఘ్‌ తిప్పికొట్టారు. అవన్నీ ఆధారం లేని వదంతులు మాత్రమేనని చెప్పారు. ఐపీఓ విషయంలో తమ ప్రణాళికలు ఇంకా సజీవంగానే ఉన్నాయని తెలిపారు. నియంత్రణా సంస్థలు, బ్యాంకర్లతో చర్చలు జరుపుతున్నట్లు పేర్కొన్నారు. ఐపీఓ పరిమాణంలోనూ ఎలాంటి మార్పు ఉండబోదని స్పష్టం చేశారు.