Andhra News: చెంప పగలగొట్టి.. కాలితో తన్ని..!

ఆర్టీసీ డ్రైవర్‌పై మహిళ దాడి

సూర్యారావుపేట, న్యూస్‌టుడే: తన ద్విచక్ర వాహనంపైకి ఆర్టీసీ బస్సు దూసుకొచ్చిందన్న ఆగ్రహంతో విజయవాడ నగరం గవర్నర్‌పేట ప్రకాశం రోడ్డులో బుధవారం ఓ మహిళ వీరంగం సృష్టించింది. పోలీసులు, ప్రత్యక్ష సాక్షుల వివరాల ప్రకారం... విజయవాడ వాంబే కాలనీకి చెందిన ముసలయ్య ఆర్టీసీ డ్రైవరు. విద్యాధరపురం డిపోలో విధులు నిర్వహిస్తున్నారు. బుధవారం బస్సు తీసుకొని ప్రకాశంరోడ్డులో వెళుతున్నారు. మధ్యాహ్నం 3.30 గంటల సమయంలో ఆంధ్రా ఆసుపత్రి ఎదురుగా నందిని అనే మహిళ ద్విచక్రవాహనంపై వెళుతూ బస్సుకు అడ్డొచ్చింది. ముసలయ్య బ్రేకు వేయగా బస్సు మహిళ సమీపంలోకి వెళ్లి ఆగింది. ఈ ఆకస్మిక పరిణామంతో సదరు మహిళ ఆగ్రహంతో తిట్టుకుంటూ బస్సులోకి ప్రవేశించి డ్రైవర్‌పై దాడి చేసింది. డ్రైవర్‌ను కొట్టి, చొక్కా చింపి, కాలితో తన్నింది. విషయం తెలుసుకుని పోలీసులు వచ్చి ఇద్దరినీ పోలీసు స్టేషన్‌కు తరలించారు. డ్రైవర్‌ ఇచ్చిన ఫిర్యాదు మేరకు సూర్యారావుపేట పోలీసులు మహిళపై పలు సెక్షన్ల కింద కేసు నమోదు చేశారు. దాడికి పాల్పడిన మహిళ కృష్ణలంక తారకరామానగర్‌కు చెందిన కుంభా నందినిగా గుర్తించారు.