TS News: తహసీల్దార్‌పై డీజిల్‌ పోసిన రైతు

శివ్వంపేట: మెదక్‌ జిల్లాలో తహసీల్దార్‌పై ఓ రైతు డీజిల్‌ పోశాడు. ఈ ఘటన శివ్వంపేట తహసీల్దార్‌ కార్యాలయం వద్ద చోటుచేసుకుంది. వివరాల్లోకి వెళితే.. సోమవారం తాళ్లపల్లి తండాలో రైతు మాలోత్‌ బాలు విద్యుదాఘాతంతో మృతిచెందారు. తహసీల్దార్‌ భానుప్రకాశ్‌ సకాలంలో పట్టా పాసుపుస్తకాలు ఇవ్వలేదని.. ఈ కారణంగానే మాలోత్‌ బాలుకు బీమా రాలేదని రైతులు ఆరోపిస్తున్నారు. మంగళవారం రైతులంతా మాలోత్‌ బాలు మృతదేహంతో శివ్వంపేట తహసీల్దార్‌ కార్యాలయం వద్ద ఆందోళనకు దిగారు. అయినా తహసీల్దార్‌ పట్టించుకోవడం లేదని ఆగ్రహం వ్యక్తం చేశారు. ఈ క్రమంలో ఓ రైతు తహసీల్దార్ భానుప్రకాశ్‌పై డీజిల్‌ పోశాడు. దీంతో అక్కడ ఉద్రిక్తత నెలకొంది. పోలీసులు తహసీల్దార్‌ కార్యాలయం వద్ద చేరుకుని రైతులకు నచ్చజెపుతున్నారు.