నాటు బాంబు పేలుడుతో తెగిన మహిళ చేతివేళ్లు

పత్తికొండ గ్రామీణం, న్యూస్‌టుడే: కర్నూలు జిల్లా పత్తికొండలో శనివారం నాటుబాంబు పేలి ఓ మహిళా రైతు చేతివేళ్లు తెగాయి. ఎస్సై భూపాలుడు తెలిపిన వివరాల మేరకు.. పత్తికొండ శివారులోని అటవీ ప్రాంతానికి ఆనుకొని ఉన్న పొలంలో హయాద్‌బీ అనే మహిళ పత్తి కోత చేపట్టారు. ఓ ప్లాస్టిక్‌ కవర్‌లో నిమ్మకాయ పరిమాణంలో ఉన్న రెండింటిని గుర్తించిన హయాద్‌బీ.. వాటికి చుట్టి ఉన్న దారాన్ని విప్పి చూస్తుండగా చేతిలోనే పేలిపోయింది. దీంతో ఆమె చేతివేళ్లు తెగిపోయాయి. గాయపడిన ఆమెను ఆసుపత్రికి తరలించారు. అదే ప్రాంతంలో పేలకుండా ఉన్న మరో బాంబును పోలీసులు స్వాధీనం చేసుకున్నారు. వీటిని అడవి జంతువుల కోసం ఉంచినవిగా భావిస్తున్నట్లు ఎస్సై భూపాలుడు తెలిపారు.