ప్రముఖ వాస్తు నిపుణుడి దారుణ హత్య.. శరీరంపై 39 కత్తిపోట్లు

హుబ్బళ్లి, న్యూస్‌టుడే: ప్రముఖ వాస్తు నిపుణుడు చంద్రశేఖర గురూజీ మంగళవారం కర్ణాటకలోని హుబ్బళ్లిలో దారుణ హత్యకు గురయ్యారు. నగర శివార్లలోని ఉణకల్‌ హోటల్‌లో ఈ ఘాతుకం చోటుచేసుకున్నట్లు పోలీసు కమిషనర్‌ లాభూరాం వెల్లడించారు. వాస్తు సూచనల కోసమంటూ వచ్చిన ఇద్దరు ఆగంతుకులు ఆయనను కత్తులతో విచ్చలవిడిగా పొడిచి పరారయ్యారు. ఆయన శరీరంపై 39 కత్తిపోట్లు ఉన్నట్లు పోలీసులు తెలిపారు. అనుమానితుల ఆచూకీ కోసం... హోటల్‌ రిసెప్షన్‌లో అమర్చిన నిఘా కెమెరాల ఫుటేజీని పరిశీలిస్తున్నారు. ఈ హత్యకు కారణాలు తెలియరాలేదు. చంద్రశేఖర గురూజీకి సరళవాస్తు నిపుణుడిగా జాతీయ స్థాయిలో పేరుంది. అనేక టెలివిజన్‌ ఛానళ్లలో ఆయన వాస్తుకు సంబంధించిన సలహాలు, సూచనలిచ్చేవారు. 2వేలకుపైగా సెమినార్లలో పాల్గొన్నారు. జాతీయ, అంతర్జాతీయ స్థాయిలో 16కు పైగా అవార్డులు లభించాయి. సివిల్‌ ఇంజినీరింగ్‌తో పాటు కాస్మిక్‌ ఆర్కిటెక్చర్‌లో చంద్రశేఖర గురూజీ డాక్టరేట్‌ పొందారు.