వృద్ధురాలిపై అత్యాచారం.. హత్య

పోలీసుల అదుపులో యువకుడు

రొంపిచర్ల, న్యూస్‌టుడే: పల్నాడు జిల్లా రొంపిచర్ల మండలం విప్పర్లలో ఓ వృద్ధురాలు అత్యాచారంతోపాటు హత్యకు గురైంది. పోలీసుల కథనం ప్రకారం.. విప్పర్లకు చెందిన వృద్ధురాలు (65) తన ఇంటి ముందు రోజులాగా శుక్రవారం రాత్రి నిద్రకు ఉపక్రమించింది. శనివారం వేకువన ఎంతకూ లేవకపోవటంతో సమీప బంధువులు వెళ్లి చూడగా, అప్పటికే మృతి చెంది ఉంది. బంధువులు పోలీసులకు సమాచారమిచ్చారు. మృతురాలి శరీరంపై గాయాలతోపాటు దుస్తులు తొలగించి ఉండటంతో అత్యాచారం చేసి హత్య చేసి ఉండవచ్చనే అనుమానంతో వారు డాగ్‌స్క్వాడ్‌ను తెప్పించారు. మృతదేహం వద్ద నుంచి సమీపంలోని ఓ ఇంటి వద్దకు డాగ్‌స్క్వాడ్‌లు వెళ్లాయి. దీంతో ఆ ఇంట్లో ఉంటున్న పెరవలి మణికంఠ (27)ను అదుపులోకి తీసుకొని పోలీసులు విచారించారు. తాగిన మైకంలో అతడు అత్యాచారం చేయడంతోపాటు దాడిచేసి చంపినట్లు విచారణలో తెలిసింది. నిందితుడిని పోలీసులు అదుపులోకి తీసుకున్నారు. మృతురాలికి ఇద్దరు కుమారులున్నారు. కుటుంబీకుల ఫిర్యాదు మేరకు పోలీసులు కేసు నమోదు చేశారు.