రైలు ఆగిందని సెల్‌ఫోన్‌ చోరీకి యత్నం

ప్రయాణికులకు చిక్కడంతో ఐదు కిలోమీటర్లు వేలాడుతూ ప్రయాణం!

భాగల్‌పుర్‌ (బిహార్‌): రైలు ఆగడంతో కిటికీలోంచి సెల్‌ఫోన్‌ కొట్టేసేందుకు ప్రయత్నించిన ఓ దొంగకు... ప్రయాణికులు మూడు చెరువుల నీళ్లు తాగించారు! బిహార్‌లోని భాగల్‌పుర్‌లో ఈ ఘటన చోటుచేసుకొంది. ఇక్కడి మమల్ఖా రైల్వేస్టేషన్‌లో బుధవారం ఓ రైలు నిలవగా... ఓ యువకుడు రైలు కిటికీలో చేయిపెట్టి, ప్రయాణికుడి చేతిలోని సెల్‌ఫోన్‌ను లాక్కున్నాడు. ఆ వెంటనే అక్కడి నుంచి పారిపోయేందుకు ప్రయత్నిస్తుండగా... పక్కన తలుపు వద్ద ఉన్న కొందరు ప్రయాణికులు అతడి చేయిని పట్టుకున్నారు. ఇంతలోనే రైలు కదిలింది. దీంతో తనను విడిచిపెట్టాలని అతడు వేడుకున్నా, వారు వినలేదు. ఈ క్రమంలోనే రైలు 80-100 కిలోమీటర్ల వేగం అందుకుంది. కొద్దిసేపటి తర్వాత ప్రయాణికులు అతడిని బోగీలోకి ఈడ్చి కొట్టారు. ఐదు కిలోమీటర్లు ప్రయాణించిన తర్వాత కహల్‌గావ్‌ స్టేషన్‌లో ఆర్‌పీఎఫ్‌ జవాన్లకు నిందితుడిని అప్పగించినట్టు సమాచారం. ఘటనకు సంబంధించిన వీడియో వైరల్‌గా మారినా, అధికారులు ధ్రువీకరించలేదు.