పేలిన యుద్ధట్యాంకు గొట్టం

యూపీలో ఇద్దరు సైనిక సిబ్బంది దుర్మరణం

దిల్లీ: భారత సైన్యానికి చెందిన టి-90 యుద్ధట్యాంకు గొట్టం పేలి ఇద్దరు సైనిక సిబ్బంది ప్రాణాలు కోల్పోయారు. మరో జవాన్‌కు గాయాలయ్యాయి. ఉత్తర్‌ప్రదేశ్‌లోని బబీనా ఫీల్డ్‌ ఫైరింగ్‌ రేంజ్‌లో ఈ దుర్ఘటన జరిగింది. ఆ సమయంలో కాల్పుల అభ్యాసాలు జరుగుతున్నాయి. పేలుడు సంభవించినప్పుడు ట్యాంకులో కమాండర్‌, గన్నర్‌, డ్రైవర్‌ ఉన్నారు. ఈ ముగ్గురూ తీవ్రంగా గాయపడ్డారు. వీరిని హుటాహుటిన బబీనాలోని సైనిక ఆసుపత్రికి తరలించారు. అక్కడ చికిత్స పొందుతూ కమాండర్‌, గన్నర్‌ చనిపోయారని అధికారులు తెలిపారు. ఈ ప్రమాదంపై సైనిక ఉన్నతాధికారులు విచారణకు ఆదేశించారు.