రుణయాప్‌ నిర్వాహకుల వేధింపులతో యువకుడి ఆత్మహత్య

కరీంనగర్‌ నేరవార్తలు, న్యూస్‌టుడే: రుణయాప్‌ నిర్వాహకుల వేధింపులతో మనస్తాపానికి గురైన ఓ యువకుడు పురుగుల మందు తాగి ఆత్మహత్యకు పాల్పడినట్లు పోలీసులు తెలిపారు. కరీంనగర్‌ ఒకటో ఠాణా ఎస్సై రహీం పాషా తెలిపిన వివరాల ప్రకారం.. నగరంలోని సాయినగర్‌కు చెందిన శ్రీరాముల శ్రవణ్‌ (33) కూరగాయలు విక్రయిస్తూ కుటుంబాన్ని పోషిస్తుండేవారు. అవసరాల నిమిత్తం రుణయాప్‌ల ద్వారా రూ.3 లక్షల అప్పు తీసుకున్నారు. అందులో కొంత స్నేహితులకు అప్పుగా ఇచ్చారు. వారు ఆ డబ్బులు ఇవ్వకపోవడంతో రుణం చెల్లించలేకపోయారు. రుణం చెల్లించాలంటూ యాప్‌ సంస్థల నిర్వాహకుల నుంచి వేధింపులు ఎక్కువవడంతో అతను ఈనెల 23న కరీంనగర్‌ అంబేడ్కర్‌ స్టేడియం ఆవరణలో పురుగుల మందు తాగాడు. కుటుంబసభ్యులు అతణ్ని చికిత్స నిమిత్తం తొలుత జిల్లా ప్రభుత్వ ఆసుపత్రికి, అనంతరం హైదరాబాద్‌కు తరలించారు. అక్కడ చికిత్స పొందుతూ గురువారం ఉదయం మృతి చెందారు.