Zaheerabad: భర్త మరణం తట్టుకోలేక బావిలో దూకిన భార్య

జహీరాబాద్‌ అర్బన్‌: సంగారెడ్డి జిల్లా జహీరాబాద్‌ మండలం కాశింపూర్‌లో విషాదం చోటుచేసుకుంది. భర్త మరణం తట్టుకోలేక ఓ మహిళ ఆత్మహత్యకు పాల్పడింది. పోలీసులు తెలిపిన వివరాల ప్రకారం..  గ్రామానికి చెందిన మహాదేవి(35) భర్త శేఖర్‌ 3 నెలల క్రితం మృతి చెందాడు. భర్త మరణాన్ని తట్టుకోలేక శనివారం అర్ధరాత్రి ఇంట్లో నుంచి వెళ్లిన భార్య మహాదేవి గ్రామ సమీపంలోని వ్యవయసాయ బావిలో దూకి ఆత్మహత్యకు పాల్పడింది. సమాచారం తెలుసుకొని గ్రామానికి చేరుకున్న చిరాగ్‌పల్లి పోలీసులు బావిలో నుంచి మృతదేహాన్ని వెలికితీసి జహీరాబాద్‌ ఆసుపత్రికి తరలించారు.

కుటుంబ కలహాలతో మరో వ్యక్తి

కాశింపూర్‌ గ్రామానికే చెందిన నర్సింహులు (40) మద్యం మత్తులో కుటుంబ సభ్యులతో గొడవపడి తెల్లవారు జామున బావిలో దూకి బలవన్మరణానికి పాల్పడ్డాడు. నర్సింహులు దూకిన బావిలో నీరు ఎక్కువగా ఉండటంతో మృతదేహం లభ్యం కాలేదు. పోలీసులు కేసు నమోదు చేసుకొని దర్యాప్తు చేపట్టారు.