Vizag: బంగారం చోరీ కేసులో యువ నటి అరెస్టు

గురుద్వారా, న్యూస్‌టుడే : దొండపర్తి బాలాజీ రెసిడెన్సీలో జరిగిన దొంగతనం కేసులో ఓ యువ నటిని ఆదివారం నాల్గవ పట్టణ పోలీసులు అరెస్టు చేశారు. ఆమె నుంచి 40 తులాల బంగారం స్వాధీనం చేసుకున్నారు. పోలీసులు తెలిపిన వివరాలు ఇలా.. పెందుర్తికి చెందిన సౌమ్యశెట్టి బాధితుడు ప్రసాద్‌ కుమార్తెకు ఇన్‌స్టాగ్రాంలో కొన్నాళ్ల క్రితం పరిచయం అయింది. ఫిబ్రవరి 2న ఆమె ఇంటికి వచ్చిన ఈ యువతి బీరువాలో ఉన్న బంగారాన్ని దొంగిలించింది. బాధితుడు ప్రసాద్‌ గత నెల 23న బీరువా తెరిచి చూడగా అందులో 74 తులాల బంగారం కనిపించలేదని పోలీసులకు ఫిర్యాదు చేశారు. కేసు నమోదు చేసి దర్యాప్తు చేసిన పోలీసులు సౌమ్యశెట్టి ఈ బంగారాన్ని దొంగిలించినట్లుగా నిర్ధారించుకుని ఆమెను అరెస్టు చేశారు. సౌమ్యశెట్టి పలు చిత్రాల్లో నటించింది. చోరీ తరువాత నగలతో గోవా వెళ్లిపోయినట్లు పోలీసులు గుర్తించారు.