అధికార దాహం.. అదుపులేని ప్రచారం!

విద్యార్థులకు జగనన్న విద్యాకానుక పేరిట అందించిన సంచులు

చింతపల్లి, న్యూస్‌టుడే: వైకాపా ప్రభుత్వ ప్రచారానికి అంతు లేకుండా పోతోంది. విద్యార్థులకిచ్చే పాఠ్యపుస్తకాలు, బెల్టులు, బ్యాగులు, చివరకు అంగన్‌వాడీల్లో చిన్నారులకు ఇచ్చే పాలప్యాకెట్లు, పోషకాహారం, చిక్కీలను సైతం తమ ప్రచారాస్త్రంగా వాడుకోవడంలో ముఖ్యమంత్రి జగన్‌మోహన్‌రెడ్డి ముందుంటున్నారు. ఎన్నికల కోడ్‌ అమల్లోకి రావడంతో అధికారులు బహిరంగ ప్రదేశాల్లో, ప్రభుత్వ కార్యాలయాల వద్ద ఉన్న రాజకీయ నాయకుల చిత్రాలు, పోస్టర్లు, గోడపత్రికలు తొలగించారు. ఇక్కడవరకూ బాగానే ఉన్నా జగనన్న విద్యాకానుక కింద విద్యార్థులకు ఇచ్చే పలు రకాల వస్తువులపై ఆ పథకం పేరు యథావిధిగా ఉంది. పాఠ్యపుస్తకాలపైనా పలు పథకాలకు సంబంధించిన పేర్లు, చిత్రాలు, లోగోలు ఉండిపోయాయి. వాటిని ఎలా తొలగించాలన్నది ఇప్పుడు పెద్ద సమస్యగా మారింది. భవిష్యత్తులో తమ ప్రచారానికి బాగా ఉపయోగపడతాయన్న ముందు చూపుతోనే ఇలా పాఠ్యపుస్తకాలపైనా పథకాల పేర్లు, లోగోలు ముద్రించి ఉంటారని ప్రతిపక్షాలు ఆరోపిస్తున్నాయి. ప్రతిరోజూ విద్యార్థులు ప్రభుత్వం పంపిణీ చేసిన యూనిఫాంతోపాటు బెల్టులు, బ్యాగులు ధరించి బడులకు వెళుతున్నారు. వాటిపై జగనన్న విద్యాకానుక అని ఉంది. ఎన్నికల కమిషన్‌ ఈ తరహా వ్యవహారాలపై దృష్టి సారించాలని ప్రతిపక్ష నేతలు కోరుతున్నారు.