‘విశాఖ- మలేసియా’ విమాన సర్వీసు ప్రారంభం

ఎన్‌ఏడీకూడలి(కాకానినగర్‌), న్యూస్‌టుడే : విమాన ప్రయాణికులకు మెరుగైన సేవలు అందిస్తామని విమానాశ్రయం డైరెక్టర్‌ ఎస్‌.రాజారెడ్డి తెలిపారు. శుక్రవారం విశాఖపట్నం నుంచి థాయ్‌ ఎయిర్‌ఏసియా ద్వారా మలేసియాకు అంతర్జాతీయ విమాన సేవలు ప్రారంభించారు. ఈ సందర్భంగా ఆయన మాట్లాడుతూ కౌలాలంపూర్‌ నుంచి రాత్రి 9:30 గంటలకు విశాఖ విమానాశ్రయానికి చేరుకున్న విమానం, తిరిగి 10 గంటలకు బయలుదేరి శనివారం తెల్లవారుజాము 4:20 గంటలకు కౌలాలంపూర్‌ చేరుతుందన్నారు. పర్యాటకులు వీసా ఆన్‌ అరైవల్‌ సౌకర్యంతో కౌలాలంపూర్‌ను సందర్శించే అవకాశం ఉందని, దీన్ని సద్వినియోగం చేసుకోవాలన్నారు. కార్యక్రమంలో విమానాశ్రయ సలహా కమిటీ సభ్యులు కె.కుమార్‌రాజా, ఓ.నరేశ్‌కుమార్‌, డి.ఎస్‌.వర్మ, తదితరులు పాల్గొన్నారు.