నేడు విశాఖలో చంద్రబాబు సభ

విశాఖపట్నం, న్యూస్‌టుడే: ఎన్నికల ప్రచారం నిర్వహించేందుకు తెదేపా అధినేత చంద్రబాబునాయుడు గురువారం విశాఖ రానున్నారు. విశాఖ దక్షిణం, ఉత్తరం నియోజకవర్గాలకు సంబంధించి సీతంపేట కూడలిలో జరిగే సభలో పాల్గొని ప్రసంగిస్తారని తెదేపా విశాఖ లోక్‌సభ నియోజకవర్గ అధ్యక్షులు గండి బాబ్జీ తెలిపారు. సాయంత్రం 6.30గంటలకు సభ జరుగుతుందని, పార్టీ కార్యకర్తలు, నాయకులు భారీ సంఖ్యలో తరలిరావాలన్నారు. తొలుత పేర్కొన్నట్లు రోడ్‌షో లేదన్నారు. రాత్రికి పార్టీ కార్యాలయ ఆవరణలోని బస్సులో చంద్రబాబు బస చేస్తారని, శుక్రవారం ఉదయం తిరుగు ప్రయాణమవుతారని చెప్పారు.