జపాన్‌ బూట్లు... ఆపేను పాము కాట్లు

ఈటీవీ-అమరావతి

జపాన్‌ బూట్లు చూపిస్తున్నరైతు బాలశశికాంత్‌

పొలంలో పాముకాట్ల నుంచి తప్పించుకోడానికి ఆ రైతు వినూత్నమైన విరుగుడు ఏర్పాటు చేసుకున్నారు. గుంటూరు జిల్లా వట్టిచెరుకూరు మండలం ముట్లూరుకు చెందిన బాల శశికాంత్‌ ప్రత్యేకమైన బూట్లు వినియోగిస్తున్నారు. యూ ట్యూబ్‌లో వీడియో చూసి వీటిని హైదరాబాద్‌ నుంచి తెప్పించినట్లు ఆయన తెలిపారు. వీటి ధర రూ.13 వందలు.  పైరుకు మందు చల్లే సమయంలో పాములు, ఇతర విషపురుగుల నుంచి రక్షణ కోసం వీటిని కొన్నట్లు శశికాంత్‌ తెలిపారు. శశికాంత్‌ తన పొలంలో మిరప సాగు చేశారు. తామరపురుగుల దాడి నుంచి పంటను కాపాడేందుకు రాత్రిసమయంలో మందులు పిచికారీ చేయాల్సి వచ్చింది. ఆ సమయంలో ఇబ్బంది లేకుండా ఇవి బాగా ఉపయోగపడినట్లు చెప్పారు. పై భాగంలో ఉన్న బెల్టుని మన నడుముకు కట్టుకుంటే కిందకు రాకుండా అలాగే ఉండిపోతాయని వివరించారు. జపాన్‌ బూట్లుగా పిలిచే వీటితో బురద పొలాల్లో కూడా సులువుగా నడవొచ్చు. సాధారణంగా ఈ తరహా బూట్లు విదేశాల్లో వరి పండించే రైతులు ఎక్కువగా ఉపయోగిస్తారు. అందుకే వీటిని పాడీ షూస్‌ అని కూడా పిలుస్తారు.