Andhra News: పవన్‌.. జనసేనను తాకట్టు పెట్టే పనిలో ఉన్నారు: ద్వారంపూడి

అమరావతి: పవన్‌ కల్యాణ్‌ జనసేన పార్టీని తాకట్టు పెట్టే పనిలో ఉన్నారని వైకాపా ఎమ్మెల్యే ద్వారంపూడి చంద్రశేఖర్‌రెడ్డి అన్నారు. తన జోలికొస్తే సహించేది లేదని హెచ్చరించారు. ఏపీ అసెంబ్లీ సమావేశాలకు హాజరైన ఆయన మీడియాతో మాట్లాడారు.

‘‘పవన్‌ కల్యాణ్‌ నిన్న ఇప్పటంలో పెట్టిన సభ పార్టీ ప్రమోషన్‌ కోసం కాదు.. పార్టీని అమ్ముకోవడానికి పెట్టుకున్న సభ. నా సభకు ఇంత మంది హాజరయ్యారు. నాకెంత ప్యాకేజీ ఇస్తారని చెప్పడం కోసమే పెట్టిన సభ. నా జోలికొస్తే ఊరుకోను.. నేను అంత శాంతిపరుడినైతే కాను. సినిమాల్లో పది మందిని కొట్టినంత మాత్రాన హీరో కాదు. రాజకీయాల్లో హీరోయిజం వేరు. జనసేన నాయకులందరూ మీ నాయకుడిని ప్రశ్నించండి. మనం కలిసి పోటీ చేస్తామా? విడిగా పోటీ చేస్తామా?అని ప్రశ్నించండి. పవన్‌కు చేతనైతే ఒంటరిగా వచ్చి పోరాడాలి. అలాగైతేనే రాష్ట్ర ప్రజలు హీరోగా గుర్తిస్తారు’’ అని ద్వారంపూడి అన్నారు.