Kethireddy Peddareddy: ‘జగన్‌కు సారీ చెప్తే.. జేసీ కుమారుడిని ఎమ్మెల్యేని చేస్తా’

తాడిపత్రి ఎమ్మెల్యే పెద్దారెడ్డి వ్యాఖ్య

అనంతపురం (రాణినగర్‌), న్యూస్‌టుడే: ముఖ్యమంత్రి జగన్‌ వద్దకు వచ్చి తప్పు చేశానని జేసీ ప్రభాకర్‌రెడ్డి ఒప్పుకుంటే ఆయన కుమారుడిని ఎమ్మెల్యేగా చేస్తానని తాడిపత్రి ఎమ్మెల్యే పెద్దారెడ్డి అన్నారు. మంగళవారం అనంతపురంలో ఆయన మీడియాతో మాట్లాడారు. 30 ఏళ్లు రాజకీయాలు చేసిన జేసీ సోదరులు దిగజారిపోతున్నారని, ప్రతిసారీ అరుస్తూ అందరినీ భయపెట్టే వాతావరణాన్ని సృష్టిస్తున్నారన్నారు. ఆయన అధ్యాయం ముగిసి పోయిందని, రాబోవు ఎన్నికల్లో ఓటమి తప్పదన్నారు. తాను అందరి తరహా రాజకీయ నేతను కాదన్నారు. నా ఉనికి పోతుంది అంటే ఎంత దూరమైనా వెళ్తా, నీతో యుద్ధం చేస్తా.. అని వ్యాఖ్యానించారు. అప్పట్లో తన సోదరుడి హత్యలో జేసీ దివాకర్‌రెడ్డి, ప్రభాకర్‌రెడ్డి కుట్రదారులని అప్పుడు నేను జైల్లో ఉన్నందున కేసు వీగిపోయేలా చేశారని ఆరోపించారు. 2024 ఎన్నికల తర్వాత జేసీ సోదరుల పరిస్థితి ఘోరంగా ఉంటుందన్నారు.