హత్యచేసి రైలు పట్టాలపై పడేశారు

పోలీస్‌ స్టేషన్‌ ఎదుట బంధువుల ధర్నా

ధర్నా చేస్తున్న మృతుని బంధువులు

పాకాల, న్యూస్‌టుడే: మతాంతర వివాహం నేపథ్యంలో బాలిక బంధువులే తమ కుమారుడ్ని చంపేసి రైలు పట్టాలపై పడేశారని బాధిత తల్లిదండ్రులు మునస్వామి, పార్వతి ఆరోపించారు. బుధవారం వారు, బంధువులతో కలిసి పాకాల పోలీస్‌ స్టేషన్‌ ఎదుట బైఠాయించి ధర్నా చేశారు. మండలంలోని ఇరంగారిపల్లి పంచాయతీ తలారిపల్లికి చింతకాయల మురళి(29)ని ఫకీరుపేటకు చెందిన పీలేరు కర్ణ, రఫీ, బంధువులు హత్యచేసి రైల్వే ట్రాక్‌పై పడేశారని  సీఐ రాజగోపాల్‌కు ఫిర్యాదు చేశారు. ఫకీరుపేటకు చెందిన బాలికను మురళి మతాంతర వివాహం చేసుకున్నాడన్నారు. దీనిపై బాలిక తండ్రి చాన్‌బాషా ఫిర్యాదు చేయడంతో పోలీసులు వారిని పిలిపించి బాలికను తల్లిదండ్రులకు అప్పగించారని వివరించారు. ఆ సమయంలో సెల్‌ఫోన్‌ను బాలిక బంధువులు తీసుకున్నారని, ఇదేమని అడిగితే ఫోన్‌ చూశాక తిరిగి ఇస్తామని చెప్పారని, దాని కోసం వెళ్లి శావమై వచ్చారని ఆరోపించారు. దీనిపై విచారించి న్యాయం చేయాలని వారు విజ్ఞప్తి చేశారు.