పనులు చేయకుంటే మీ ఇళ్ల వద్ద దీక్ష చేస్తా

ఎమ్మెల్యే వెంకటేగౌడ

పలమనేరు: నియోజకవర్గ పరిధిలో గత ప్రభుత్వం చేపట్టిన రోడ్ల పనులు పూర్తిచేయకుంటే మీ ఇళ్ల వద్ద ధర్నా చేస్తామని ఎమ్మెల్యే వెంకటేగౌడ.. మాజీ మంత్రి అమరనాథరెడ్డిని హెచ్చరించారు. శనివారం తన పార్టీ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. 2018-19లో పలు రోడ్డు పనులకు సంబంధించి ప్రభుత్వంతో అగ్రిమెంట్లు జరిగాయన్నారు. మాజీ మంత్రి అమరనాథరెడ్డి అప్పట్లో అన్ని పనులను ఒకేసారి ప్రారంభించి వదిలేశారన్నారు. బైరెడ్డిపల్లె, గంగవరం, పెద్దపంజాణి, వి.కోట, రామకుప్పం మండలాల్లో మొత్తం 87 రోడ్లకు రూ.123 కోట్లతో పనులు ప్రారంభమయ్యాయన్నారు. శ్రీనివాస కన్‌స్ట్రక్షన్స్‌ సంస్థ ఈ పనులు చేపట్టిందని, అప్పట్లో ఎన్నికలు రావడంతో పనులు చేయకుండా వదిలేశారన్నారు. కంపెనీ అమరనాథరెడ్డికి బినామీగా వ్యవహరిస్తోందని.. ఆయా పనులు పూర్తి చేయకుంటే అన్ని గ్రామాల ప్రజలను తీసుకొచ్చి అమరనాథరెడ్డి ఇంటి వద్ద, శ్రీనివాస కన్‌స్ట్రక్షన్‌ కంపెనీ ఎదుట నిరాహారదీక్ష చేస్తానని ఎమ్మెల్యే హెచ్చరించారు. సోమవారం అన్ని మండల కేంద్రాల్లో అసంపూర్తి రోడ్ల పనులకు సంబంధించి అధికారులకు వినతిపత్రాలు ఇవ్వాలని మండల స్థాయి ప్రజాప్రతినిధులను ఆయన కోరారు. వైకాపా నాయకులు మండి సుధాకర్‌, మురళీకృష్ణ, బాలాజీనాయుడు, విశ్వనాథరెడ్డి పాల్గొన్నారు.