సైకిల్‌పై ప్రచారం చేస్తున్న కార్యకర్తపై వైకాపా మూకదాడి

తెదేపా కార్యకర్త స్వామినాథన్‌

కుప్పం గ్రామీణ, న్యూస్‌టుడే: కుప్పం మండలం కొట్టాలూరు పంచాయతీ సిద్ధప్పనూరు గ్రామానికి చెందిన తెదేపా కార్యకర్త స్వామినాథన్‌పై సోమవారం సాయంత్రం వైకాపా మూకలు దాడికి పాల్పడ్డాయి. బాధితుడి కథనం మేరకు.. స్వామినాథన్‌ సైకిల్‌పై చిన్న మైకు పెట్టుకుని గ్రామాల్లో తెదేపాకు మద్దతుగా ప్రచారం చేస్తున్నారు. ఈ క్రమంలో సోమవారం సాయంత్రం మేస్త్రినాయనూరు గ్రామానికి వెళ్తుండగా కొటాలూరు పంచాయతీకి చెందిన వైకాపా నాయకులు నాగరాజు, పన్నీర్‌, సంపత్‌, కేశవులు అడ్డగించి మైకు, అందులోని చిప్‌, చరవాణి లాక్కున్నారు. దౌర్జన్యం చేసి దాడికి పాల్పడ్డట్లు బాధితుడు కుప్పం పోలీసులకు ఫిర్యాదు చేశారు.