రైలు పట్టాలపై నవదంపతుల ఆత్మహత్య

నిఖిల్‌ సాయి

ఘట్‌కేసర్‌, న్యూస్‌టుడే: ప్రేమించి పెళ్లిచేసుకున్న జంట పెద్దలను ఎదిరించలేక తనువు చాలించింది. మేడ్చల్‌-మల్కాజిగిరి జిల్లా ఘట్‌కేసర్‌లో ఈ ఘటన చోటుచేసుకుంది. సికింద్రాబాద్‌ రైల్వే ఎస్సై మాజీద్‌ తెలిపిన వివరాల ప్రకారం.. శుక్రవారం ఉదయం 11 గంటల ప్రాంతంలో ఘట్‌కేసర్‌ రైల్వేస్టేషన్‌ సమీపంలోని యంనంపేట వద్ద యువతి, యువకుడి మృతదేహాలు పడి ఉన్నట్లు సిబ్బంది ఫోన్‌ చేసి పోలీసులకు సమాచారం ఇచ్చారు. వారు ఘటనా స్థలికి చేరుకొని మృతదేహాలను పరిశీలించారు. యువకుడి ప్యాంటు జేబులో ఉన్న ఓటరు గుర్తింపు కార్డు, వాహన డ్రైవింగ్‌ లైసెన్స్‌ ఆధారంగా హబ్సిగూడ రోడ్డు నంబరు-8 వీవీనగర్‌కు చెందిన కుంచెల నిఖిల్‌సాయి(26)గా గుర్తించారు. యువకుడి కుటుంబీకుల సమాచారం మేరకు.. యువతి మల్లాపూర్‌ ఎన్టీఆర్‌నగర్‌కు చెందిన కె.ప్రియాంక(25)గా గుర్తించారు. యువతి మెడలో రోల్డ్‌గోల్డ్‌ గొలుసు, పసుపుకొమ్ము ఉన్నాయి. ప్రేమ పెళ్లి చేసుకుని పెద్దలను ఎదిరించలేక ఆత్మహత్యకు పాల్పడినట్లు తెలిసింది. మృతదేహాలను గాంధీ ఆసుపత్రికి తరలించామని ఎస్సై పేర్కొన్నారు.