ఎల్లారెడ్డిగూడలో గ్యాస్‌ సిలిండర్‌ పేలుడు.. ముగ్గురికి గాయాలు

పంజాగుట్ట: అమీర్‌పేట పరిధిలోని ఎల్లారెడ్డిగూడలోని ఓ ఇంట్లో గ్యాస్‌ సిలిండర్‌ పేలింది. ఈ ఘటనలో ముగ్గురికి గాయాలయ్యాయి. వివరాల్లోకి వెళితే ఎల్లారెడ్డిగూడలో జి.నరసింహ అనే వ్యక్తి తాపీమేస్త్రిగా పనిచేస్తున్నారు. ఈరోజు ఉదయం ఆయన గ్యాస్‌స్టౌపై చాయ్‌ పెట్టేందుకు అగ్గిపుల్ల వెలిగించారు. అప్పటికే గ్యాస్‌ లీకై ఉండటంతో ఒక్కసారిగా పేలుడు సంభవించింది. ఈ ఘటనలో నరసింహతో పాటు ఆయన భార్య నాగలక్ష్మి తీవ్రంగా గాయపడ్డారు. వారి కుమారుడు గణేశ్‌కు స్వల్ప గాయాలయ్యాయి. నరసింహ, నాగలక్ష్మిలను అమీర్‌పేటలోని వెల్‌నెస్‌ సెంటర్‌లో చికిత్స నిమిత్తం చేర్పించారు. గణేశ్‌ స్వల్ప గాయాలతో అమీర్‌పేటలోని ఆస్పత్రిలో చికిత్స పొందుతున్నాడు. పంజాగుట్ట ఎస్సై ఉపేంద్రబాబు కేసు నమోదు చేసి దర్యాప్తు చేస్తున్నారు.