మల్కాజిగిరిలో మళ్లీ కాంగ్రెస్‌ జెండా ఎగరాలి

బెలూన్లను ఎగరేస్తున్న సునీతారెడ్డి, మహేందర్‌రెడ్డి, బండి రమేష్‌ తదితరులు

మూసాపేట, న్యూస్‌టుడే: మల్కాజిగిరి పార్లమెంటు నియోజకవర్గంపై మరోమారు కాంగ్రెస్‌ జెండా ఎగరాలని మంత్రి తుమ్మల నాగేశ్వరరావు పేర్కొన్నారు. కాంగ్రెస్‌ కూకట్‌పల్లి నియోజకవర్గ స్థాయి కార్యకర్తల సమావేశం శుక్రవారం ఎన్‌కేఎన్‌ఆర్‌ గార్డెన్స్‌లో జరిగింది. ముఖ్యమంత్రి రేవంత్‌రెడ్డికి మల్కాజిగిరి ఎంపీ స్థానం గుండెకాయ లాంటిదన్నారు. రేవంత్‌ను గెలిపించి రాష్ట్ర గతినే మార్చిన ఘనత ఈ ప్రాంతానికి దక్కిందన్నారు. ఈసారి పట్నం సునీతారెడ్డిని భారీ మెజారిటీతో గెలిపించి ఆ రికార్డును పునరావృతం చేయాలన్నారు. మాజీ మంత్రి పట్నం మహేందర్‌రెడ్డి, డీసీసీ అధ్యక్షుడు సింగిరెడ్డి హరివర్ధన్‌రెడ్డి మాట్లాడారు. పట్నం సునీతారెడ్డి మాట్లాడుతూ.. పార్లమెంటులో మహిళల వాణి వినిపించడానికి కాంగ్రెస్‌ తనకు అవకాశం కల్పించిందన్నారు. పార్టీ నియోజకవర్గ ఇన్‌ఛార్జి బండి రమేష్‌, సత్యం శ్రీరంగం తదితరులు పాల్గొన్నారు.