జూబ్లీహిల్స్‌ కేసులో నా కుమారుడిని ఇరికించే కుట్ర

బోధన్‌ మాజీ ఎమ్మెల్యే షకీల్‌ ఆరోపణ

 ఈనాడు, నిజామాబాద్‌: జూబ్లీహిల్స్‌ రోడ్డు ప్రమాదం కేసులో తన కుమారుడిని ఇరికించేందుకు పోలీసులు కుట్ర చేస్తున్నారని బోధన్‌ మాజీ ఎమ్మెల్యే షకీల్‌ ఆరోపించారు. నేరం ఒప్పుకోవాలని తన కొడుకుని ఒత్తిడి చేస్తున్నారని.. ఎన్‌కౌంటర్‌ చేస్తామని బెదిరించారన్నారు. ఈ మేరకు బుధవారం ఆయన ఓ వీడియో విడుదల చేశారు. పంజాగుట్ట ఠాణా పరిధిలో బారికేడ్లను ఢీకొట్టిన కేసులో వేధించడంతో పాటు ఘటన జరిగినప్పుడు దుబాయిలో ఉన్న తన పేరు కూడా చేర్చారన్నారు. తన కొడుకు తప్పు చేస్తే ఉరితీయాలని.. కానీ ఇప్పటికే ట్రయల్‌ నడుస్తున్న కేసులో ప్రమేయం లేకున్నా ఇరికించడం సరికాదన్నారు. పారదర్శకంగా విచారణ జరిపించాలని ముఖ్యమంత్రికి విజ్ఞప్తి చేశారు. కేసును సీబీఐ లేదా హైకోర్టు సిట్టింగ్‌ జడ్జితో విచారణ చేయించాలని డిమాండ్‌ చేశారు. తన కుమారుడికి ఏమైనా జరిగితే వెస్ట్‌జోన్‌ డీసీపీ, ఇతర పోలీసు అధికారులే బాధ్యులవుతారని పేర్కొన్నారు.