ఒప్పంద కార్మికుల నిరసన

స్వాతంత్య్ర ఉద్యానవనంలో ఆందోళనకు దిగిన సిబ్బంది నినాదాలు

బెంగళూరు (సదాశివనగర), న్యూస్‌టుడే : ఆరోగ్య, కుటుంబ సంక్షేమ శాఖలో ఒప్పంద కార్మికుల కోసం విశ్రాంత ఐఏఎస్‌ అధికారి శ్రీనివాసాచారి ఇచ్చిన నివేదికలోని సిఫార్సులు అమలు చేయాలంటూ ఉద్యోగులు, ఒప్పంద కార్మికులు సోమవారం ఆందోళనకు దిగారు. బెంగళూరు స్వాతంత్య్ర ఉద్యానవనంలో ధర్నా చేశారు. సమాన పనికి సమానవేతనం, ఉద్యోగ భద్రతకు చర్యలు తీసుకోవాలంటూ వివిధ జిల్లాల నుంచి వచ్చిన పొరుగుసేవలు, ఒప్పంద కార్మికులు నినదించారు. సీనియారిటీ ఆధారంగా ఒప్పంద కార్మికులు, పొరుగు సేవల సిబ్బందికి ముందుగా శాశ్వత ప్రాతిపదికన ఉద్యోగాలు ఇవ్వాలంటూ ఆందోళనకారులు నినాదాలు చేశారు. శ్రీనివాసాచారి నివేదిక ఇచ్చి ఏడాదిన్నర గడుస్తున్నా, ప్రభుత్వం ఇప్పటి వరకు చర్యలు తీసుకోకపోవడం శోచనీయమని వారంతా ఆక్రోశించారు.