Karnataka Results : తొమ్మిదోసారీ.. ఆయనే

ఆర్‌.వి.దేశ్‌పాండె

బెంగళూరు (యశ్వంతపుర), న్యూస్‌టుడే : కాంగ్రెస్‌ సీనియర్‌ నాయకుడు ఆర్‌.వి.దేశ్‌పాండే (76) తొమ్మిదోసారి విధానసభ ఎన్నికల్లో విజయం సాధించి.. చరిత్ర సృష్టించారు. ఆయన హళియాళ విధానసభ నియోజకవర్గం నుంచి పోటీ చేసి విధానసౌధ బాటపట్టారు. 1976 నుంచి ఆయన రాజకీయాల్లో కొనసాగుతున్నారు. తొలినాళ్లలో సహకార మహామండలి అధ్యక్షుడిగా పని చేశారు. రామకృష్ణహెగ్డే నేతృత్వంలో 1980లో జరిగిన ఎన్నికల్లో జనతాపార్టీ అభ్యర్థిగా పోటీ చేసి విజయం సాధించారు. అనంతరం కాంగ్రెస్‌లో చేరి.. నేటి వరకు ఓటమి ఎరగకుండా విజయం సాధిస్తున్నారు. ప్రాథమిక విద్య, రెవెన్యూ, భారీ పరిశ్రమలు, ఆరోగ్యం తదితర శాఖలను నిర్వహించారు. రాష్ట్రంలో ఇప్పటి వరకు తొమ్మిదిసార్లు విధానసభకు మల్లికార్జున ఖర్గే, ధరంసింగ్‌ ఎన్నికయ్యారు. వారి జాబితాలో ఆర్‌.వి.దేశ్‌పాండే చేరారు.