మంత్రి మల్లికార్జున ప్రచారం

బోవి గురుపీఠాన్ని సందర్శించిన మంత్రి ఎస్‌.ఎస్‌.మల్లికార్జునను సత్కరించిన ఆధ్యాత్మిక గురువులు

చెళ్లకెర (చిత్రదుర్గం), న్యూస్‌టుడే: బోవి గురుపీఠాన్ని సందర్శించిన రాష్ట్ర మంత్రి ఎస్‌ఎస్‌ మల్లికార్జున వివిధ పీఠాధిపతులను కలిసి లోక్‌సభ ఎన్నికల్లో దావణగెరె కాంగ్రెస్‌ అభ్యర్థి డా.ప్రభ మల్లికార్జునకు మద్దతు ఇవ్వాల్సిందిగా విజ్ఞప్తి చేశారు. బుధవారం పట్టణంలోని బోవి గురుపీఠంలో వెనుకబడిన వర్గాల జాతుల 12 మఠాలకు చెందిన ఆధ్యాత్మిక గురువులను కలిసి చర్చించారు. సభలో బోవి గురుపీఠాధిపతి ఇమ్మది సిద్ధరామ స్వామి, కుంచిటిగ పీఠాధిపతి డా.శాంతవీరస్వామి, వాల్మీకి పీఠాధిపతి వాల్మీకి ప్రసన్నానందస్వామి, భగీరథ పీఠాధిపతి పురుషోత్తమానందపురిస్వామి, యాదవ గురుపీఠాధిపతి శ్రీ కృష్ణ యాదవానందస్వామి, రజకుల గురుపీఠాధిపతి బసవ మాచిదేవ స్వామి ఈడిగ గురుపీఠాధిపతి రేణుకానందస్వామి, కుంబార పీఠాధిపతి బసవ కుంబార గుండయ్య స్వామి హాజరయ్యారు. ఈ సందర్భంగా ఆధ్యాత్మిక గురువులు మంత్రిని సత్కరించారు. ప్రముఖులు హెచ్‌ జయణ్ణ, నాగరాజ్‌ పాల్గొన్నారు.