కనుల ముందుకు కలల లోకం

రామోజీ ఫిల్మ్‌సిటీలో సందడి షురూ
హాలిడే కార్నివాల్‌లో కోలాహలం 

యురేకా వేదిక వద్ద కళాకారుల నృత్య ప్రదర్శన

రామోజీ ఫిల్మ్‌సిటీ, న్యూస్‌టుడే : ఎప్పుడెప్పుడా అని ఎదురు చూస్తున్న వేసవి సెలవులు రానే వచ్చాయి.. వస్తూ వస్తూ ప్రపంచ ప్రఖ్యాత రామోజీ ఫిల్మ్‌సిటీలో వినోదాల వేడుకలను తీసుకువచ్చాయి. సెలవు రోజుల్లో ప్రకృతి రమణీయ అందాల ఫిల్మ్‌సిటీలో సరదా సరదాగా గడిపేందుకు తరలివచ్చిన పర్యాటకులతో కోలాహలం గురువారం ప్రారంభమైంది. బంధుమిత్రులు, కుటుంబ సభ్యులతో కలిసి ఫిల్మ్‌సిటీకి తరలివచ్చిన సందర్శకులు వినోదాలను ఆస్వాదిస్తూ ఆనందతీరాలను చవిచూస్తున్నారు. సంభ్రమాశ్చర్యానికి గురిచేసేలా తొలిసారి వర్చువల్‌ షూట్‌ అనుభూతిని పర్యాటకులకు అందుబాటులో ఉంచడంతో ఆబాలగోపాలం ఆ అనుభూతిని ప్రత్యక్షంగా వీక్షించి ఆనందిస్తున్నారు. ఉదయం 9 నుంచి రాత్రి 9 గంటల వరకు రోజంతా మైమరపించే ఫిల్మ్‌సిటీ అందాల మధ్య ఆనందడోలికల్లో తేలియాడుతూ వినోదం, విహారం కలగలిసిన హాలిడే కార్నివాల్‌లో పర్యాటకులు ఉత్సాహంగా పాలుపంచుకుంటున్నారు.

ప్రత్యేకతలెన్నో

రామోజీ ఫిల్మ్‌సిటీలో హాలిడే కార్నివాల్‌లో ప్రత్యేకతలెన్నో పర్యాటకులను ఆకట్టుకుంటున్నాయి. సినీ ప్రేక్షకుల మదినిదోచే ఆధునిక సాంకేతికత.. మోషన్‌ క్యాప్చర్‌, వర్చువల్‌ షూట్‌ను ఆసక్తిగా వీక్షిస్తున్నారు. ఫిల్మ్‌సిటీలోని వర్చువల్‌ ప్రొడక్షన్‌ సెట్‌లోకి అడుగుపెట్టి ఆ క్షణాలను ప్రతి  ఒక్కరూ మధుర  జ్ఞాపకాలుగా మలుచుకుంటున్నారు. అంతేకాదండోయ్‌ రెయిన్‌ డ్యాన్స్‌ ఫ్లోర్‌పై వేసవితాపం దరిచేరకుండా జల్లుల్లో తడిసిముద్దవుతూ సందర్శకులు ఆనందతీరాలను చేరుతున్నారు. ఉత్సాహం, ఉత్తేజం నింపే సంగీతానికి అనుగుణంగా డ్యాన్స్‌ చేస్తూ సరికొత్త ఆనందాల్లో మునిగితేలుతున్నారు. యురేకా వేదికపై కళాకారుల ప్రదర్శనలు ఆకట్టుకుంటున్నాయి. ఫిల్మ్‌సిటీలో మునుపెన్నడూ చూడని మ్యాజికల్‌ గ్లో గార్డెన్‌ అందాలను కళ్లారా వీక్షిస్తూ కలల లోకంలోకి వచ్చిన అనుభూతిని పొందుతున్నారు. మిరుమిట్లు గొలిపే రంగురంగుల విద్యుత్తు దీపకాంతుల్లో మెరిసే గార్డెన్‌లో శిల్పాలు, వివిధ జంతు ఆకృతులు ఆకట్టుకుంటున్నాయి. కనువిందుగా సాగే కార్నివాల్‌ పరేడ్‌లో డీజే బీట్లకు ఆడుతూ సంతోషాల్లో తేలియాడుతున్నారు.

ప్రత్యేక ప్యాకేజీలు

హాలిడే కార్నివాల్‌లో పాలుపంచుకోవాలనుకునే వారి కోసం ప్రత్యేక ప్యాకేజీలు అందుబాటులో ఉన్నాయి. ఉదయం 9 నుంచి రాత్రి 9 గంటల వరకు, మధ్యాహ్నం 2 నుంచి రాత్రి 9 గంటల వరకు వివిధ ప్యాకేజీలున్నాయి. ఉదయం 9 నుంచి రాత్రి 9 వరకు వేడుకలను ఆస్వాదించేందుకు వచ్చే పర్యాటకులు స్టూడియో టూర్‌ను నాన్‌ ఏసీ బస్సులో తిరిగి వీక్షించవచ్చు. ప్రీమియం ప్యాకేజీని ఎంచుకొనే పర్యాటకులకు ఏసీ బస్సులో స్టూడియో టూర్‌, ప్రత్యేక షోలకు ఎక్స్‌ప్రెస్‌ ఎంట్రీ అవకాశం, బఫెట్‌ లంచ్‌ అందిస్తారు. మరో ప్యాకేజీలో స్టూడియో టూర్‌తో పాటు పరిమితమైన కాంబో డిన్నర్‌ అందిస్తారు. మధ్యాహ్నం 2 నుంచి రాత్రి 9 గంటల వరకు ప్యాకేజీని ఎంచుకుంటే స్టూడియో టూర్‌, పరిమితమైన కాంబో డిన్నర్‌ అందిస్తారు. ప్రీమియం ఈవినింగ్‌ ప్యాకేజీని ఎంచుకొనే వారికి ఏసీ బస్సులో స్టూడియో టూర్‌, ప్రత్యేక షోలకు ఎక్స్‌ప్రెస్‌ ఎంట్రీ అవకాశం ఉంటుంది. బఫే డిన్నర్‌ అందిస్తారు. చిన్నారులకు స్పెషల్‌ సమ్మర్‌ ప్యాకేజీలు అందుబాటులో ఉన్నాయి.

మరిన్ని వివరాలకు..:www.ramojifilmcity.com కు లాగిన్‌ అవ్వండి. లేదా 76598 76598కు ఫోన్‌ చేయండి.

కార్నివాల్‌ పరేడ్‌

రెయిన్‌ డ్యాన్స్‌