బిడ్డ పుట్టిన ఆనందం.. తల్లికి ప్రాణాపాయం

దాతల సాయం కోసం చూస్తున్న ఎక్కిరాల శివజ్యోతి

తల్లాడ, న్యూస్‌టుడే:   నిరుపేద కుటుంబమైనా దంపతులు రెక్కల కష్టమ్మీద ఆధారపడి తోడూనీడగా కాపురం చేశారు. తాము తల్లిదండ్రులం అవుతున్నామని ఎంతో ఆనందించారు. బిడ్డకు జన్మనివ్వగానే తల్లి ప్రాణాపాయ స్థితికి చేరుకుంది. రెండు కిడ్నీలు చెడిపోయాయని తెలిసి భర్త బోరున విలపించారు. భార్యను ఎలా కాపాడుకోవాలో తెలియక అసహాయ స్థితిలో దాతల సాయం కోసం అర్థిస్తున్నాడు. వివరాలిలా ఉన్నాయి.. తల్లాడ మండలం వెంగన్నపేట(గూడూరు) గ్రామానికి చెందిన ఎక్కిరాల శివజ్యోతి వారం రోజుల క్రితం వరంగల్‌ ఎంజీఎం ఆసుపత్రిలో బాబుకు జన్మనిచ్చింది. బిడ్డ పుట్టగానే తల్లి శివజ్యోతి రెండు కిడ్నీలు పనిచేయడం లేదని వైద్యులు తెలిపారు. ప్రస్తుతం శివజ్యోతికి డయాలసిస్‌ జరుగుతోంది. కనీసం ఆమె తన బాబుకు పాలు ఇచ్చే స్థితిలో కూడా లేదు. శివజ్యోతి భర్త రామారావు ఆటో నడుపుతూ కుటుంబాన్ని పోషిస్తున్నాడు. తాను కూడా అనారోగ్యంతో బాధపడుతున్నాడు. ఆమెను వైద్యులు ప్రైవేట్‌ ఆసుపత్రికి రిఫర్‌ చేస్తున్నారు. నిరుపేద కుటుంబం కావడంతో వైద్యం అందించలేక దిక్కుతోచని స్థితిలో సాయం కోసం ఎదురు చూస్తున్నారు. దాతలు స్పందించి వైద్యచికిత్సలకు ఆర్థికసాయం అందించాలని శివజ్యోతి భర్త రామారావు కోరుతున్నాడు.