ప్రమాదవశాత్తు చెరువులో పడి వ్యక్తి మృత్యువాత

నిరంజన్‌

బిజినేపల్లి, న్యూస్‌టుడే : వరి నారు మడికి నీరు మళ్లించే క్రమంలో ప్రమాదవశాత్తు చెరువులో పడి వ్యక్తి మృతిచెందిన సంఘటన బిజినేపల్లి మండలం నందివడ్డెమాన్‌ గ్రామంలో ఆదివారం చోటు చేసుకుంది. ఎస్సై వెంకటేశ్‌ కథనం ప్రకారం.. నందివడ్డెమాన్‌ గ్రామానికి చెందిన నిరంజన్‌ (49) బీమ సముద్రం చెరువు కింద వరి సాగుచేస్తున్నాడు. ఇదే క్రమంలో వరి నారుమడికి నీరు పారించేందుకు చెరువుకట్టపై నుంచి వెళ్తుండగా, ప్రమాదవశాత్తు కాలుజారి చెరువులో పడి, నీటమునిగాడు. స్థానికులు చెరువులో గాలించి బయటకు తీయగా అప్పటికే మృతి చెందాడు. సంఘటనపై భార్య ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై తెలిపారు.