తుమ్మిళ్లలో తాగునీటి కష్టాలు

రాజోలి: మిషన్ భగీరథ నీరు అరకొరగా రావడం, నీరు అపరిశుభ్రంగా వస్తుండటంతో మండలంలోని తుమ్మిళ్ల గ్రామంలో ప్రజలు తాగునీటి కష్టాలను ఎదుర్కొంటున్నారు. ప్రతినిత్యం వారు దూరంగా ఉన్న నదికి వెళ్లి చెలిమెల నీరు తెచ్చుకుంటున్నారు. గ్రామంలో 4 వేలకు పైగా జనాభా నివసిస్తున్నారు. వారందరికి మూడు ట్యాంకుల నీరు అందాల్సి ఉండగా, పూర్తి స్థాయిలో అందడం లేదు. కొన్ని రోజుల క్రితమే ఈ సమస్యను గుర్తించిన అధికారులు తుంగభద్ర నదిలో నీటి ట్యాంకు తవ్వించి నీరు సరఫరా చేస్తున్నారు. రానున్న రోజుల్లో సమస్య మరింత తీవ్రమయ్యే అవకాశం ఉండటంతో, ప్రత్యామ్నాయ చర్యలు చేపట్టాలని అధికారులను ప్రజలు కోరుతున్నారు.