చెలమ నీరే దిక్కు

న్యూస్‌టుడే, రాజోలి: మిషన్‌ భగీరథ నీరు అరకొరగా రావడం, స్థానిక నీరు అపరిశుభ్రంగా వస్తుండటంతో మండలంలోని తుమ్మిళ్ల గ్రామంలో చాలా మంది ప్రజలకు చెలమల నీరే ఆధారమైంది. గ్రామంలో 4 వేలకు పైగా జనాభా ఉండగా, మూడు ట్యాంకులకు మిషన్‌ భగీరథ నీరు అందాల్సి ఉండగా, పూర్తి స్థాయిలో అందడం లేదు. కొన్ని రోజుల కిందటే సమస్యను గుర్తించిన అధికారులు తుంగభద్ర నదిలో నీటికుంటను తవ్వించి సరఫరా చేస్తున్నారు. అవి కూడా అపరిశుభ్రంగా వస్తుండటంతో చేసేది లేక ఉదయం, సాయంత్రం ప్రజలు చెలమల వద్దకు క్యూ కడుతున్నారు. ద్విచక్ర వాహనాలతో చిన్నారులు, పెద్దలు నదిలోకి వెళ్తున్నారు. అలాగే దూరంగా ఉన్న వ్యవసాయ బోర్ల వద్దకు వెళ్తున్నారు. రానున్న రోజుల్లో సమస్య మరింత తీవ్రమయ్యే అవకాశం ఉండటంతో, ప్రత్యామ్నాయ చర్యలు చేపట్టాలని ప్రజలు కోరుతున్నారు.