పెళ్లి చేసుకుంటానని మోసగించాడంటూ ఫిర్యాదు

మిర్యాలగూడ, న్యూస్‌టుడే: మిర్యాలగూడ పట్టణంలోని ముత్తిరెడ్డికుంటకు చెందిన చర్చి ఫాదర్‌ నతానియేలు తనను వివాహం చేసుకుంటానని మోసగించాడంటూ ఓ మహిళ మంగళవారం ఒకటో పట్టణ పోలీసులను ఆశ్రయించారు. బాధితురాలు విలేకరులకు తెలిపిన వివరాలు ఈ విధంగా ఉన్నాయి. గత ఐదేళ్లుగా చర్చిలో సేవలందిస్తున్న తనను ఐదు నెలలుగా ఫాదర్‌ నతానియేలు వివాహం చేసుకుంటానని నమ్మబలికి సహజీవనం చేశారని, పెళ్లి చేసుకోమని అడిగితే ఇప్పుడు మోహం చాటేేస్తున్నాడని వాపోయారు. తనను చర్చి నుంచి వెళ్లగొట్టేందుకు ప్రయత్నిస్తున్నాడని ఆరోపించారు. తనకు న్యాయం చేయాలని కోరారు. ఈ మేరకు బాధితురాలి ఫిర్యాదుతో కేసు నమోదు చేసుకుని దర్యాప్తు చేస్తున్నామని సీఐ మండవ శ్రీనివాస్‌ తెలిపారు.