చైన్ స్నాచింగ్‌కు పాల్పడుతున్న ముఠా అరెస్టు

భువనగిరి: జిల్లాలో వరుసగా గొలుసు దొంగతనాలకు, చైన్ స్నాచింగ్‌కు పాల్పడుతున్న ముఠాను భువనగిరి పోలీసులు అరెస్టు చేశారు. రాచకొండ పోలీస్ కమిషనర్ తరుణ్ జోషి ఈ ముఠా వివరాలను విలేకరుల సమావేశంలో వెల్లడించారు. ప్రధాన నిందితుడు మరియాదాస్‌తో పాటు లక్ష్మీ, శివ, రాజేశ్‌లను అరెస్టు చేశామన్నారు. వారి నుంచి 41 తులాల బంగారం, రెండు కిలోల వెండి, ఒక ద్విచక్ర వాహనం స్వాధీనం చేసుకున్నామన్నారు. దొంగలను పట్టుకోవడంలో కీలకపాత్ర వహించిన పోలీస్ సిబ్బందిని సీసీ తరుణ్ జోషి అభినందించి రివార్డులు అందజేశారు. సమావేశంలో భువనగిరి జోన్ డీసీపీ రాజేష్ చంద్ర తదితరులు పాల్గొన్నారు.