మతోన్మాద భాజపాను ఓడించండి: సీపీఐ

నల్గొండలో సీపీఐ కార్యాలయంలో మాట్లాడుతున్న ఆ పార్టీ జాతీయ సమితి సభ్యుడు పల్లా వెంకట్‌రెడ్డి, చిత్రంలో కుందూరు జానారెడ్డి, ఎంపీ అభ్యర్థి రఘువీర్‌ రెడ్డి, డీసీసీ అధ్యక్షుడు శంకర్‌నాయక్‌, తదితరులు

నల్గొండ గ్రామీణం, న్యూస్‌టుడే: దేశంలో మతోన్మాదం పేరుతో రాజకీయాలు చేస్తున్న భాజపాను ఓడించి కాంగ్రెస్‌ అభ్యర్ధులను భారీ మెజార్టీతో గెలిపించాలని సీపీఐ జాతీయ సమితి సభ్యుడు పల్లా వెంకట్‌రెడ్డి పిలుపునిచ్చారు. నల్గొండ లోక్‌సభ ఎన్నికల్లో కాంగ్రెస్‌కు మద్దతు ఇవ్వాలని బుధవారం ఆ పార్టీ సీనియర్‌ నేత కుందూరు జానారెడ్డి, ఎంపీ అభ్యర్థి రఘువీర్‌ రెడ్డి, జిల్లా అధ్యక్షుడు శంకర్‌నాయక్‌ జిల్లా కేంద్రంలోని సీపీఐ కార్యాలయానికి వచ్చి మద్దతు కోరారు. ఈ సందర్భంగా ఏర్పాటు చేసిన సమావేశంలో పల్లా మాట్లాడారు. ఇండియా కూటమి పొత్తులో భాగంగా సీసీఐ తెలంగాణాలో కాంగ్రెస్‌కు సంపూర్ణ మద్దతు తెలిపిందన్నారు. ప్రతి కార్యకర్త కష్టపడి ఎన్నికల్లో పనిచేయాలని కోరారు. కుందూరు జానారెడ్డి మాట్లాడుతూ.. నల్గొండ కమ్యూనిస్టు, కాంగ్రెస్‌లకు కంచుకోటగా ఉందన్నారు. ఈ రెండు పార్టీలు ఎప్పుడు కలిసి పనిచేసినా అఖండ విజయం ఖాయమన్నారు.