వైద్యుల అర్హతలు బోర్డుల మీద బహిర్గతం చేయండి

కోదాడ, న్యూస్‌టుడే: అర్హతలు లేకుండానే ఆస్పత్రుల్లో వైద్యం చేస్తున్న తీరుపై గత నెల 18న ‘నాడి తెలియని నకిలీలు’ శీర్షికన ‘ఈనాడు’లో కథనం ప్రచురితమైంది. స్పందించిన జిల్లా వైద్యాధికారి కోటచలం గురువారం పట్టణంలోని పలు ఆస్పత్రుల్లో తనిఖీలు నిర్వహించి మాట్లాడారు. హుజూర్‌నగర్‌ రోడ్డులోని రెండు ఆసుపత్రుల్లో అర్హత లేని వైద్యులు వైద్యం చేస్తున్నారని, మందులు విక్రయించే వ్యక్తికి కూడా అర్హతలు లేవని, దీంతో ఆ రెండు ఆస్పత్రులను సీజ్‌ చేసినట్లు తెలిపారు. సరైన ధ్రువపత్రాలు సమర్పించే వరకు ఆస్పత్రులు తెరవొద్దని యాజమాన్యాలను హెచ్చరించారు. ఆస్పత్రుల్లో వైద్యులు తమ అర్హతలు, రిజిస్ట్రేషన్‌ నంబర్లు బోర్డుల మీద తప్పనిసరిగా బహిర్గతం చేయాలని, లేని పక్షంలో కఠిన చర్యలు తీసుకుంటామన్నారు. కార్యక్రమంలో డిప్యూటీ డీఎంహెచ్‌వో నిరంజన్‌, కల్యాణ్‌ చక్రవర్తి, అంజయ్య, తదితరులు పాల్గొన్నారు.