భక్తవత్సలుడికి సంప్రదాయ ఆరాధనలు

శ్రీలక్ష్మీనరసింహుల కల్యాణ క్రతువు

యాదగిరిగుట్ట అర్బన్‌, న్యూస్‌టుడే: యాదాద్రి పుణ్యక్షేత్రంలో గురువారం స్వయంభువులైన పంచనారసింహులను ఆరాధిస్తూ చేపట్టిన నిత్య పూజలు ఆలయ ఆచారంగా కొనసాగాయి. వేకువజామున సుప్రభాతం చేపట్టిన పూజారులు గర్భాలయ ద్వారాలను తెరిచి మూలవరులకు హారతినిచ్చి కొలిచారు. పాలతో నిజాభిషేకం నిర్వహించాక, తులసీపత్రాలతో అర్చన చేపట్టారు. శ్రీలక్ష్మీనరసింహస్వామి స్వర్ణమూర్తులకు స్వర్ణ పుష్పార్చన జరిపారు. వేద, మంత్ర పఠనంతో ఆలయ మహాముఖ మండపంలో యజ్ఞమూర్తులను కొలుస్తూ అష్టోత్తరం, సువర్ణ పుష్పార్చన క్రతువులను కొనసాగించారు.  సుదర్శన నారసింహ హోమం, నిత్య కల్యాణం ఆలయ ఆచారంగా చేపట్టారు. కల్యాణమూర్తులను అలంకృతులను చేసి సేవా పర్వం నిర్వహించారు. సాయంత్రం అలంకార జోడు సేవలను మాడవీధుల్లో ఊరేగించారు. రాత్రి గర్భాలయంలోని స్వయంభువులను కొలుస్తూ ప్రత్యేక ఆరాధన జరిపారు. వివిధ విభాగాల ద్వారా రూ.21,43,492 నిత్యాదాయం సమకూరినట్లు ఆలయ ఈవో భాస్కర్‌రావు తెలిపారు.